【瑞典大選實況直擊】
四年一度瑞典國會、縣議會、省議會大選九月九日進行。三級議會選舉每屆同日進行，都係比例代表制。出 po 呢一刻已經點咗 99.95% 票中，截止現時為止三大政黨勢力排位同現屆無異，Socialdemokraterna 成功冧莊，Moderaterna 同 Sverigedemokraterna 繼續做阿二同阿三，以上政黨順序亦為左中右勢力。
喺瑞典投票同香港最大嘅唔同就係，香港嘅選票上面係列晒該選區所有不同政黨嘅候選名單，再由你剔選支持邊張名單。
而瑞典，你一行入票站就會見到一堆選票按議會級別同政黨整齊排列放晒喺度任你拎，選票以顏色區分議會級別：黃色選票為國會級、藍色為省級、白色為縣級。
不同黨派在有參與的各級議會投票中，都各自擁有兩張選票供選民領取；一張只印該政黨名號，一張則印有該政黨名號以及該黨旗下候選人名單。前者係投比個黨，無指名投比該黨邊位候選人，後者則指名投比某一位候選人。
站內另設沒有印上任何政黨名號或候選人名單的空白選票，選民可在該選票上自行填上所投政黨或候選人。直接把這空白選票投出則視為白票，不會影響議席分佈。
選民要喺成堆選票中，自行拿取所需選票前往隱閉布幕，作出選擇後再入落信封，密封後再交比票站人員放入相應投票箱。即係你想喺國會投 A 黨，省議會投 B 黨，你就拎印住 A 黨嘅黃色選票，同印住 B 黨嘅藍色選票。
如果你想剔選特定候選人，就拎有印該黨旗下候選人名單嗰張，即係印住 A 黨候選名單嘅黃色選票，同印住 B 黨候選名單嘅藍色選票。
其實呢個佈置好有趣，因為喺瑞典，其實應該係全世界都係咁㗎啦，除非真係好熟或者屋企人㗎姐，否則相識又好，唔相識又好，你都未必會問人投咗咩，可能咁樣係被視為尊重對方私隱。
但其實我喺票站望住你拎印住某黨嘅選票入去布幕，我都已經知你投咩黨啦。唔想比人知？唔好同相識嘅人一齊去投票啦，不過正常都唔會約埋嘅。咁或者到時撞到鄰居呢，住喺附近都實去埋同一個票站㗎啦，唯有迴避吓唔好𥄫住人拎邊張票。嗱，一係就拎張空白選票之後先自行填上要投咩，一係就直頭唔同黨派嘅選票都拎入去，咁就無人知你最後入邊張落信封啦✌🏻
Search